Толинд харах би дуртай
Тогоруу буудаллах нуурын хаяа шүргэх ус шиг
Тогтуун бөгөөд тунгалагхан миний л гэх харцаа
Тормогор алаг нүднийхээ сормуусан доороос олох гэж
Толинд харах би дуртай
Толинд харах би дуртай
Тоос буухаас ч харамлам цэвэр ариун уруулан дахь
Тоглоомтой бөгөөд ёжтойхон миний л гэх инээмсэглэлээ
Толигор шингэн царайныхаа тэр л төрхөөс олох гэж
Толинд харах би дуртай
Толинд харах би дуртай
Торнин торнин өсөөд бүсгүй болохыг хүсээгүй
Тоост хорвоогийн албадлагаар зүсээ хувиргах өөрийгөө
Тусгал болон буух зурвасхан дүрсээс олох гэж
Толинд харах би дуртай
2009 оны 1 дугаар сар 22
