2010/09/29

Бүсгүй та ямар араншинтай вэ?

Бид амьдралдаа дэлгүүрт, нийтийн тээврийн хэрэгсэлд, цэцэрлэгт хүрээлэнд, гудамжинд хүмүүстэй дайралдаж, хааяагүй тэдний царайг харж байдаг.

Царайг нь хараад тэр хүний тухай юу хэлж болох вэ? Зан чанараас нь эхлээд авьяас, дадал зуршил гээд олон зүйлийг хэлж болно. Тухайлбал:

Хөмсөг
Хоорондоо нийлж ургасан өтгөн хар хөмсөгтэй бол өвөрмөц, хүнд зантайн шинж. Тийм хөмсөгтэй хүмүүс бүхнийг сөрөн давагч, манлайлагч байдаг. Тэд хамт байгаа хүмүүстээ санаандгүй дарамт шахалт үзүүлэх нь цөөнгүй. Ялгарах онцлог юмгүй гөлгөр хөмсөг бол үнэнчийн шинж. Тийм хүн та бүхний сайн найз байх болно. Хөмсөгний үс бүдүүн бол мэргэн ухаантайг илэрхийлнэ. Тийм хөмсөгтэй хүмүүс урт настай байдаг. Бүх талаар сайхан хөмсөг өөрийн үйл ажиллагааг хариуцаж чаддаг, ухаалаг хүнийг илэрхийлнэ. Тийм хүмүүс бас ихэмсэг бардам байдаг.

Нүд
Том нүдтэй хүн ухаантай, нарийн чамбай, чадвартай байдаг. Жижиг нүдтэй хүмүүс бол ёс суртахуун, амьдралын хатуу тогтсон хэвшилтэй, үнэнч сайн нөхөд юм. Хөнхөр нүд уянгалаг занг илэрхийлнэ. Идэвхтэй, "ашиг хонжоог” мэдрэгч хүн бүлтгэр нүдтэй байна. Тийм нүдтэй хүмүүс хэзээ ч өөрийн боломжийг алддаггүй. Хоёр нүдний хоорондын зай их бол уянгалаг, уян зөөлний шинж.

Хамар
Огтор хамартай бол хүний үг дагамтгай, шийдэмгий бусын шинж. Шулуун хамар үнэнч, бүх талаар шударга зантайн шинж. Тийм хамартай хүн түвшин зантай. Шантгар хамартай хүмүүс хөгжилтэй, хөл хөнгөнтэй, нууц хадгалахдаа тааруу. Бүргэд хамартан захирангуй, бардам, ихэмсэг зантай байдаг. Монтгор хамартай бол сайхан сэтгэлтэй, дуулгавартайн шинж. Хамрынхаа үзүүрт зураастай хүн бялдууч, долигонуур зантай байдаг.

Эрүү
Эрүүн дээрх хонхорхой өрнүүн, тачаангуй зангийн шинж тэмдэг. Тийм эрүүтэй хүн ямагт хүүхэд зантай, дандаа дүрсгүйтэх гэж байдаг боловч тоглоом, шоглоомоо заримдаа хэтрүүлдэг. Шовх эрүү эрүүл мэнд муутайн шинж. Дугуй эрүүтэй хүн уйтгартай, ямагт өөрөө өөртөө түгжээтэй байдаг.

Уруул
Нимгэн уруултай, том амтай бол шийдэмгий, хатуу, эрчимтэй, бардам зантайн шинж. Жимбэгэр уруултай хүн алиа хошин, олуулаа цугларан наргих дуртай. Татсан нумын хэлбэртэй уруултай хүн ямагт өөрөө өөртөө, ойр орчныхондоо, ер нь бүх зүйлд гомдож байдаг. Намхан нуруутай, нимгэн уруултан бол ямагт өөрийнхөөрөө зүтгэдэг бэрх хүн. Зузаан уруултай хүн эмзэг, уян сэтгэлтэй, заримдаа хайр сэтгэлд хөнгөмсөг ханддаг байна.

Чих
Нимгэн шовгор чих тогтворгүй, хувирамтгай зантайн шинж. Том чих мэдрэмтгий, сайхан сэтгэлтэйг гэрчилнэ. Чихний унжлага урт бол мэргэн ухаантайг гэрчилнэ, тийм чихтэй хүмүүс урт насалдаг.
"Хүнийг нүүр царайгаар таних” ухаан олон мянган жилийн түүхтэй ч орчин үеийн эрдэмтэд ингэж хүний тухай ямар нэг тодорхой зүйлийг яг хэлэх бололцоогүй гэж үздэг байна.

/Монцамэ/
blog comments powered by Disqus
:
Вебсайт захиалгаар чанартай хийж үйлчилнэ. zayaznet@yahoo.com Биотогоор бариа засал хийнэ, эмчилнэ. 96688201, 97671271
 
Copyright © 2010 Zayaz.net Сайтын мэдээллийг ашиглах тохиолдолд заавал нэрийг дурдана. Вебсайтын загварыг Да Пино